News Round-up Ek Nazar ma

Telangana mein Deputy Tehsildar rishwat lete pakde gaye, Gurukul–Anganwadi–Hostels mein andon ki supply mein dhokhadadi saamne aayi, sadak haadse ke zakhmiyon ki jaan bachane par ₹25,000 inaam ka elaan hua, aur Pakistan ne Gaza ke liye 100 ton imdaadi saamaan rawana kiya. Sub ne ws ek jagah in Simple hinglish mein.

online slowdown rishwat case andon ki supply irregularities aur Gaza ke liye bheja gaya imdaadi saamaan shaamil hai.

Telangana aur Hyderabad ki Khabrein

Telangana Hukumat ka Iqdam Victims ke Parivar Saudi Rawana

Telangana Hukumat ka Faisla

Telangana hukumat ka ahem iqdam hua. Bus haadse mein jaan gawanane wale 45 Umrah zaireen ke parivar ka 35 rukni kafila Saudi Arab rawana hua. Telangana hukumat ne Saudi Arab mein pesh aaye khaufnak bus haadse mein jaan gawanane waale 45 Umrah zaireen ke ghar waalon aur qareebi rishtedaaron ko Saudi Arab bhejne ka ahem faisla kiya.

Kafle ki Rawangi

Hukumat ki taraf se bana 35 afraad par mushtamil kafila mangal ki raat Madina Munawwara ke liye rawana kiya gaya. Yahaan yeh log apne azizon ki Namaz e Janaza aur tadfeen mein shirkat karenge. Kafle ko rawana karne ke saare intezamaat munazzam tareeke se kiye gaye. Haj House Nampally se baad namaz e Isha lawahiqeen ko do khusoosi buson ke zariye Shamshabad International Airport bheja gaya. Wahan se yeh kafila Saudi Arab rawana hua. Sarkari zaraye ke mutabiq Telangana hukumat ne lawahiqeen ke safar rihaish aur ek hafte ke qayam ka poora intezam kiya.

Madina Aur Makkah Ka Program

Kafila pehle Madina Shareef mein marhoomeen ki tadfeen mein hissa lega. Iske baad yeh Makkah Mukarrama rawana hoga jahan woh Umrah ki adayegi bhi karenge. Is dauran lawahiqeen ki rehnumayi aur intezamaat ki dekhbhal ke liye Telangana State Haj Committee ke odedaar Irfan ke saath do aur mulazmeen bhi rawana hue hain.

Parivaron Ka Shukriya

Hukumat ke is faisle se mutasira khandaanon ko apne azizon ki tadfeen mein shirkat ka mauqa mila. Is par unhone hukumat ke is taawun par shukriya ka izhaar kiya.

Saudi Bus Accident Par Remarks Odedar Safiullah Ka Transfer

Hukumat Ki Fauri Kaarwai

Saudi bus haadse par controversial remarks karne waale odedar Safiullah ka tabadla ho gaya. Telangana hukumat ne fauri kaarwai karte hue inke khilaf action liya. Saudi Arab ke shehar Madina Munawwara ke qareeb peer ki subah bus haadse mein jaan gawanane waale Umrah zaireen ke baare mein Telangana Urdu Academy ke Director Secretary Mohammed Safiullah ke tauheen aamez remarks ke baad hukumat ne unka tabadla kar diya.

Safiullah Ke Alfaaz Aur Ehtejaaj

Safiullah ne haadse ke mutasireen ke baare mein Haj House mein jama mutasir khandan se kaha tha ki kya woh Saudi Arab jale hue naashe dekhne ja rahe hain. Jale hue tukdon ko kya dekhte. Inke is controversial remarks par shadeed ehtejaj hua aur inki badtameezi ka video social media par viral ho gaya. Iske alawa BRS khawateen aur dusre logon ne bhi in baaton ki mazammat ki.

Tabadla Aur Hukumat Ka Bayan

Hukumat ne Safiullah ko unke ohde se hata diya aur unko TG Jain ke daftar wapas bhejne ka hukm jaari kar diya. Fauri ahkamaat bhi jaari kiye gaye. Hukumat ke bayan mein kaha gaya ki is qism ke bayanaat na sirf mutasira khandaanon ki dil azaari karte hain balki riyasati idaron ki saakh ko bhi nuqsaan pahunchate hain.

Hyderabad Ke 3 Famous Biryani Hotels Par IT Raids

Mashhoor Hotels Par Karwai

Hyderabad ke teen mashhoor Biryani hotels par IT ke dhaave kiye gaye. Pista House Shah Ghouse aur Mehfil Group ki kayi shaakhon aur rihaishgahon par talashi hui. Income Tax Investigation Wing Hyderabad ne Mangal ke roz shehar ki teen sabse badi Biryani restaurants Pista House Shah Ghouse aur Mehfil Group par be waqt karwaiyan karte hue inke dafatir branches aur maalikaan ki rihaishgahon par dhaave kiye. Karwai ka maqsad croreon rupey ki farokht chhupane aur bade paimane par tax chori ke shubhaat ki jaanch karna tha.

Talashi Ka Daira

IT hukkaam ke mutabiq talashi karwai kayi muqamaat par ki gayi jo teeno branches se raabta rakhte hain. Tehqeeqat ke dauran teams ne maaliyaati record branch wise len den accounts aur mutaliqa dastavezaat ka tafseeli jaiza liya. Hukkaam ka kehna hai ki karwai ibtedai marhale mein hai aur mazeed jaanch jaari hai jiske baad izaafi tafseelaat saamne aane ka imkaan hai.

ACB Ko Dekhte Hi Sub Inspector Deewar Phaand Kar Farar

Rishwat Lete Hue Pakda Gaya

ACB hukkaam ko dekhte hi Sub Inspector deewar phaand kar farar ho gaya. Hukkaam ne taaqub karke ise pakad liya. Police station ke saamne gaon waalon ne jashn manaya. Medak zille ke Tekmal Police Station mein mangal ko ek ajeeb o gareeb waqeya dekhne mein aaya. Yahan Anti Corruption Bureau ki team ne police station ke Sub Inspector ko 30000 rishwat qubool karte hue range haathon pakad liya aur hiraasat mein le liya.

Farar Hone Ki Koshish

Poochtaachh ke dauran Sub Inspector kisi tarah ACB ki team ko chakma dete hue police station ki deewar phaand kar kheton ki taraf farar ho gaya. Iske baad ACB ki team mein shaamil odedaaron ne Sub Inspector Rajesh ka kaafi door tak taaqub kiya aur bil aakhir pakad liya. Is waqeye par ACB odedar kuch der ke liye hairatzada reh gaye. Bataya gaya hai ki ek muqami shakhs ki shikayat par ACB ne yeh karwai ki thi.

Gaon Waalon Ka Jashn

Sub Inspector Rajesh ke ACB ke haathon pakde jaane par gaon waalon ne jashn manaya. Muqami afraad police station ke saamne jama hue aur patakhe bhi chhode.

Hyderabad Srikakulam Bus Accident 8 Zakhmi

Haadse Ki Ibtidai Tafseel

Hyderabad se Srikakulam jaane waali bus ko haadsa pesh aaya. Riyasat Andhra Pradesh mein Hyderabad Vijayawada Highway par Nandigama ke qareeb waaqe Ana Sagar mein mangal ki alaa subah ek khaufnak sadak haadsa hua. Ittilaat ke mutabiq ek private travels ki bus ne ek lari ko takkar de di jiske nateeje mein aath afraad shadeed zakhmi ho gaye.

Overtake Ki Koshish Aur Takraar

Haadsa us waqt hua jab Nandigama ke muzaafaat mein Ana Sagar bypass ke qareeb bus lari ko overtake karne ki koshish kar rahi thi. Yeh bus Hyderabad se Srikakulam jaa rahi thi aur isme kul 20 musafir sawaar the. Zakhmi hone waale musafiron ka taalluq Srikakulam aur Odisha ke mukhtalif ilaqon se bataya jaata hai.

Police Ki Karwai

Police fauran mauqa e haadse par pahunchi aur zakhmiyon ko Nandigama ke sarkari aspatal bheja. Yahan se behtar ilaaj ke liye inhe Vijayawada muntaqil kar diya gaya. Police ne crane ki madad se bus aur lari ko hata kar qaumi shehrah par traffic ki aamad o raft bahal kar di.

T.G Hukumat Ke Vafd Ki Saudi Ma Consul General Se Mulaqat

Aala Satah Vafd Ka Jeddah

Telangana hukumat ke aala satah ke vafd ki Saudi Arab mein bus haadse ke silsile mein Consul General se mulaqat hui. Telangana hukumat ka ek aala satai vafd jiski qayadat Wazir e Aqaliyat Mohammed Azharuddin kar rahe hain unhone kal subah Jeddah mein Hindustan ke Consul General Janab Fahad Ahmad Khan Suri se mulaqat ki. Is mulaqat mein Wazir Mohammed Azharuddin Rukn e Assembly Majid Hussain aur Secretary Aqaliyati Mahkama B Shafiullah bhi maujood the.

Bus Haadse Par Guftagu

Yeh mulaqat Saudi Arab ke shehar Madina Munawwara mein guzishta roz pesh aane waale dil kharash bus haadse ke silsile mein hui jismein Hyderabad se taalluq rakhne waale 45 Umrah zaireen jaan gawaan baithe the. Vafd ne Consul General se haadse ki tafseelaat par tabadla e khayal kiya aur imdaadi karwaiyon aur mutasira khandaanon ko di jaane waali madad ke baare mein guftagu ki.

Hindustani Zaireen Ke Liye Koshishen

Hukkaam ne yakeen dilaya ki haadse mein jaan gawaane waale tamaam Hindustani zaireen ke liye zaroori karwaiyan fauri taur par ki ja rahi hain. Mutasira khandaanon ke saath har mumkin taawun faraham kiya jaega.

Nizambabad Ke Marhoom Sk Riyaz Ke Parivar, Govt ki Madad

Parivar Ki Mulaqat Aur Taawun

Shaikh Riyaz Marhoom Nizamabad ke ahl e khana ko double bedroom makaan bachchon ko taleem aur bewa ko mulazimat ka taawun diya gaya. Haafiz Mohammed Laeeq Khan Naib Ameer Imarat e Millat e Islamia Telangana aur Andhra ke saath marhoom Riyaz ki ahliya aur bachchon ne Musheer Hukumat Telangana Mohammed Ali Shabbir se unki rihaishgah Jubilee Hills pahunch kar mulaqat ki.

Housing Taleem Aur Mulazimat Ka Wada

Is mulaqat mein Mohammed Ali Shabbir ne marhoom Shaikh Riyaz ke parivar ko double bedroom makaan bachchon ke taleemi akhrajaat aur Riyaz ki bewa ko mulazimat mein madad ka wada kiya. Haafiz Mohammed Laeeq Khan ne Mohammed Ali Shabbir ko bataya ki Nizamabad shehar ke Mohammadia Colony ke saakin Riyaz ki 20 October ko Nizamabad police ke saath ek encounter mein maut ho gayi. Riyaz ke pasmandgan mein unki boodhi waalida Zarina Begum ahliya Sarwar Nazmeen aur do chhote bachche Ruheena Sultana aur Shaikh Rehan hain.

Khandaan Ki Maali Haalat Aur Hukumat Ka Yakeen

Haafiz Mohammed Laeeq Khan ki taraf se pesh ki gayi guzarish mein kaha gaya ki is khandaan ke paas aamdani ka koi zariya nahi mustaqil rihaish nahi aur yeh log shadeed maali pareshani ka shikar hain. Mohammed Ali Shabbir ne yakeen dilaya ki riyasati Wazir e Setaka se mushawarat ke baad housing scheme ke tehat Nizamabad mein Riyaz ki ahliya ko double bedroom makaan diya jaega. Unhone elaan kiya ki class 2 aur class 3 mein padhne waale Riyaz ke dono bachchon ke taleemi akhrajaat woh zaati taur par bardaasht karenge jab tak yeh class 5 mukammal nahi kar lete. Unhone yeh bhi kaha ki baad mein dono bachchon ko Timmareddy ke rihaishi school mein dakhila karaya jaega. Mohammed Ali Shabbir ne yeh bhi assure kiya ki Wazir e Setaka aur mutalliqa hukkaam se mushawarat ke baad Riyaz ki ahliya ke liye Timmareddy ya kisi aur mauzoo idare mein mulazimat ke liye outsourcing par gaur kiya jaega. Unhone kaha ki marhoom Riyaz ki biwi aur bachche besahara ho chuke hain aur inki insaani buniyadon par madad ki ja rahi hai.

Sari Phansne Se Two Wheeler Accident

Mancherial mein ek afsosnaak haadsa pesh aaya jisme ek khatoon ki jaan chali gayi. Indaram gaon ke qareeb Daryai Godavari ke high level bridge par itwaar ki raat yeh waqeya hua jab motorcycle ke pahiye mein sari phans gayi aur khatoon gaadi se gir gayi.

Pushpalatha Ki Maut

Police ke mutabiq 35 saal ki Pushpalatha sari phansne ki wajah se balance kho baithi aur zameen par girte hi uski maut ho gayi.

Ghar Par Afsos Ka Maahaul

Maloom hua hai ki Covid ke dauran Pushpalatha ke shauhar ki maut ho chuki thi aur ab dono bachche bilkul akelay reh gaye hain.

Telangana High Court Ka Bada Faisla

Telangana High Court ne ek bada aur sansanikhez faisla sunaya jisme saal 2015 aur 2016 ke Group II appointments ko poori tarah se cancel kar diya gaya. Adalat ne kaha ki is recruitment process mein bahut saari galtiyan aur khuli khuli beqaidgiyan ki gayi hain.

TSPSC Par Sakht Itraaz

High Court ne apne remarks mein yeh baat saaf kahi ki Telangana Public Service Commission ne takneeki committee ki waazeh hidayaat ko follow nahi kiya. Whitener cutting erasing aur double bubbling wale mashkook OMR papers ko check karke recruitment process ko nuksan pahunchaya gaya. Court ne kaha ki is wajah se pura process daagdar ho gaya.

Results 2019 Ko Bhi Radd Kar Diya

High Court ne 2019 mein jaari kiye gaye results ko bhi gair qanooni aur ek tarfa qaraar diya. Court ke mutabiq yeh results valid nahi hain aur turant cancel kiye jaate hain.

Nayi Checking Aur Aath Hafton Mein New List

Adalat ne hukm diya hai ki saare papers ko takneeki committee ki hidayaat ke mutabiq dubara se check kiya jaye. Saath hi Court ne kaha ki pure recruitment process ki fresh checking ke baad aath hafton ke andar ek nayi merit list jaari ki jaye.

Telangana Mein 1 Crore Khawateen Ko 1 Crore Sariyan

Telangana mein aaj se ek bade welfare program ka aaghaaz ho raha hai jisme hukumat 1 crore khawateen ko 1 crore sariyan de rahi hai. Yeh taqseem aaj 19 November ko Marhooma Indira Gandhi ki jayanti ke mauqe par Chief Minister Revanth Reddy ke haathon shuru hogi.

Mustahiq Khawateen Ke Liye Indiramma Sari Program

CM Revanth Reddy ne aaj ek ahem meeting ki jisme unhone kaha ki har mustahiq khandan tak Indiramma Sari pohonchana odedaaron ki zimmedari hai. Unhone bataya ki sariyan Handloom Workers ki taraf se taiyar ki jaengi aur agar taiyari mein der hoti hai to taqseem do marahil mein anjaam di jayegi.

Pehla Marhala Rural Areas Mein

Pehle marhale mein dehi ilaqon mein sariyan baanti jayengi. Indira Gandhi jayanti se shuru hone wali yeh taqseem 9 December tak jaari rahegi.

Doosra Marhala Urban Areas Mein

Doosre marhale mein shehri ilaqon mein sariyon ki taqseem 1 March se 8 March tak hogi. International Womens Day ke mauqe par 8 March ko shehri taqseem ka amal mukammal kiya jayega.

Quality Par Sakht Hidayaat

CM ne afsaron ko saaf taur par kaha ki sariyon ki quality aur meyaar par koi samjhauta nahi hoga. Taiyari se le kar taqseem tak har marhale par aala afsaron ko nigrani karni hogi.

Aaj Se Taqseem Ka Official Aaghaaz

Indira Gandhi ki jayanti ke mauqe par CM Revanth Reddy shaam ko Necklace Road par mojood Indira Gandhi ke mujassama par phool pesh karenge aur uske baad khawateen mein Indiramma sariyon ki taqseem ka aaghaaz karenge.

Telangana Mein Deputy Tehsildar Rishwat Lete Pakde Gaye

Telangana mein Anti Corruption Bureau ki karwai jaari hai aur rishwat lene waale sarkari odedaar lagataar pakde ja rahe hain. Bhadradri Kothagudem zille ke Enkur mandal mein Deputy Tehsildar Yaqub Pasha ne ek ration shop ke maalik se 20 hazaar rupaye rishwat maangi thi. Yeh rishwat is baat ke badle mein maangi gayi thi ki ration shop mein stock na rakhne aur kaam ke auqaat mein dukaan band rakhne par woh koi karwai na kare.

Rishwat Lete Hue Giraftaar

Dealers Association ke saddar ke zariye paise lene ke waqt Deputy Tehsildar Yaqub Pasha ko ACB ki team ne range haathon pakad liya. Saath hi Technical Assistant Vijay Kumar ko bhi giraftaar kiya gaya. ACB hukkaam ne dono ko mauqe par hi qaboo kar liya.

Gurukul, Anganwadi aur Hostels Ma Eggs Supply Ma Dhoka

Gurukul Schools, Anganwadi aur Hostels mein diye jaane waale andon ki supply mein bade paimane par dhokhadahi ka inkishaaf hua hai. Thekedar qawaid ke khilaf chhote size ke, kam wazan wale aur purane ande faraham kar rahe hain, jisse bachchon ki sehat par bura asar padne ka khatra hai.

Kam Wazan Aur Kharab Ande Supply

Hukumat ke mutabiq har anda 45–52 gram ka hona chahiye, lekin Anganwadi aur Hostels mein pahunchne waale andon ka wazan sirf 30–40 gram paaya gaya.
Iske alawa.

Thekedar mahine mein 3 baar delivery karne ke paband hain, lekin woh sirf 1–2 martaba hi supply kar rahe hain.
Ande zyada din tak zakheera karne ki wajah se sadd bhi ho rahe hain.
Kam qeemat par chhote size ke ande market se jama karke Anganwadi, Hostels aur Gurukuls ko bheje ja rahe hain.

Thekedar Ki Bad-dayanti

Thekedar har mahina 5 crore 38 lakh ande supply karte hain, jinke liye hukumat per egg ₹5.5 se ₹6.30 tak ada karti hai. Iske bawajood unhone kam wazan aur low-quality andon ki farahmi ka raasta ikhtiyar kar liya hai, jisse qayde qanoon ki khuli khilaaf warzi samne aati hai.

Hukumat Ka Sakht Radd-e-Amal

GO Number 16 mein wazeh guidelines ke bawajood odedaar be-qaidgiyon ko nahi rokun rahe.
Commissioner, Women & Child Welfare Shruthi Oojha ne kaha.

Chhote size ke ya kharab ande supply karne waale thekedar ke khilaf sakht karwai hogi.
Tamaam muqamaat ka inspection shuru kar diya gaya hai.

Yeh dhokhadahi na sirf qanooni khilaaf warzi hai, balke bachchon ki sehat se khelne ke barabar hai.

Sadak Haadse Ke Zakhmiyon Ki Jaan Bachane Par ₹25,000 Ka Inaam

Rachakonda Police ne ek ahem aur insaniyat bhara qadam utha te hue elaan kiya hai ke sadak haadse mein zakhmi afraad ki jaan bachane par ab Good Samaritan ko ₹25,000 naqad inaam diya jaega.

Insaani Madad Ke Badrange Rujhanat

Pehle log hamdardi ke liye haadse ke zakhmiyon ki madad karte the, lekin ab kai log video banane mein masroof ho jaate hain. Isse na sirf waqt zaya hota hai, balke kabhi-kabhi zakhmiyon ki zindagi bhi khatre mein pad jaati hai.

Rachakonda Police Ka Naya Initiative

Commissioner of Police, Sudheer Babu (IPS) ne kaha

Sadak haadse ke baad ek ghante ke andar agar koi bhi shakhs zakhmi ko hospital pohchaakar uski jaan bachata hai,
Toh Central Government ki Good Samaritan Scheme ke tehat usse ₹25,000 cash reward diya jaega.

Shehriyon Se Appeal

Commissioner ne zor diya ki.

Har shakhs agar sadkon par hifazati qawaneen ka khayal rakhe,
Aur haadsaat ke waqt insani zimmedari ka muzhira kare,
Toh sadak haadsaat mein numaayan kami laayi jaa sakti hai.

Yeh qadam un logon ke liye hosla afzai hai jo bina soche samjhe insani zindagi bachane ke liye aage badhte hain.

Desh ki Khabrein

Kai Online Platforms Slow Hue

Duniya bhar mein bahut se online platforms jaise ChatGPT Uber X aur Gemini mangal ke din achanak slow ho gaye. Canva aur kuch aur services mein bhi users ko dikkat aayi. Iski wajah Cloudflare ki service mein kharabi batayi gayi.

Cloudflare Mein Kharabi Ki Wajah

Company ke mutabiq masla door kar diya gaya hai aur khidmat phir se bahal ho gayi hai. Ek odedar ne kaha ki ab is baat ka khayal rakha jaega ki aisa masla dobara na ho. Cloudflare ek web infrastructure company hai jo duniya ke lagbhag 20 pratishat web traffic ko handle karti hai.

Users Ko Ab Bhi Masail

Masla door hone ke baad bhi kai users ne shikayat ki ki unhe ab bhi kuch platforms par slow response ya lag jaisa masla pesh aa raha hai. Guzeerishta Microsoft ke Azure platform par bhi is tarah ki dikkat saamne aayi thi.

Assam Mein Kisi Siyasi Jamaat Se Ittehad Ka Koi Iraada Nahi

Assam mein kisi siyasi jamaat se ittehad karne ka koi plan nahi hai. Majlis Party ne yeh bayaan jari kiya hai. Media ki kuch reports mein Maulana Badruddin Ajmal ki party AIUDF aur Majlis ke beech election understanding ke imkaanaat ka zikr kiya ja raha tha. Lekin All India Majlis e Ittehadul Muslimeen ne in reports ko be buniyad aur ghalat bata diya hai.

Majlis Ka Wazeh Bayaan

Majlis ne platform X par kaha hai ki na to party ne Assam mein apni siyasi sargarmiyan shuru karne ka faisla kiya hai aur na hi kisi siyasi jamaat ke saath ittehad karne ka koi iraada rakhti hai.

Congress Ka Ramlila Maidan Ma SIR Ke Khilaf Rally Ka Faisla

Congress ne Delhi ke Ramlila Maidan mein SIR ke khilaf ek badi rally karne ka faisla kiya hai. Party ke senior leaders ne aaj mukhtalif riyasaton mein voter list ki khusoosi gair e nazarsani se jude maamle par ek ahem meeting ki. Is meeting ke baad Congress ne tay kiya ki December ke pehle hafte mein Delhi ke Ramlila Maidan mein badi rally hogi.

Congress Ka Bayan Meeting Ke Baad

Meeting ke baad Pawan Khera ne media ko bataya ki jahan bhi SIR hona hai un sab riyasaton par baat hui. Congress ne kaha ki hum Ramlila Maidan mein SIR ke khilaf awaz uthayenge aur Election Commission ki siyasat ko saamne rakhenge. Unka kehna hai ki SIR mein logon ke naam target karke kaate ja rahe hain aur jaisa Bihar mein hua tha wahi baaki riyasaton mein bhi hone ka andesha hai.

SIR Par Congress Ke Aitraz

Pawan Khera ne kaha ki Congress pehle se hi SIR par sawaal uthati aa rahi hai. Bihar elections se pehle bhi party ne voter adhikar yatra nikaali thi aur SIR mein paayi jaane wali khaamiyon ko saamne laaye the. Unhone yeh bhi bataya ki Supreme Court ke paanch ahkamaat ne bhi Election Commission ke tareeqe par sawal uthaye hain.

Dastkhati Muhim Aur Party Ka Azm

Congress ne SIR ke khilaf mulk bhar mein ek signature campaign chalaya jismein 5 crore dastkhat ikattha hue. Party ka kehna hai ki voter ka haq chheena jaega toh awaz uthana hamari zimmedari hai.

Zimni Intekhab Aur Party Ki Hidaayat

Media reports ke mutabiq meeting mein aainda hone wale zimni intekhabaat ko lekar leaders ko alert rehne ko kaha gaya hai. Mashwara diya gaya ki election ke dauran ₹10000 khawateen ko dene jaise mansoobon par koi qadam na uthe aur election code lagne ke baad voter list mein naam jodne ya kaatne ka amal na ho. Party ki legal team ko bhi poori tayyari ke saath rehne ki hidaayat di gayi hai.

Videsh ki Khabrein

Pakistan Se Gaza Ke Liye 100 Ton Imdaadi Saamaan Rawana

Pakistan ne Gaza ke logon ke liye 100 ton imdaadi saamaan par mushtamil apni pachiwin imdaadi khep rawana kar di. Yeh saamaan Lahore Airport se bheja gaya jismein khaime, khaane ka saamaan aur doosri zaroori cheezen shaamil hain. NDMA ke tarjuman ne bataya ki Wazir e Azam ki hidaayat par Pakistan Gaza ke awam ki madad lagataar jaari rakhe hue hai.

NDMA Ki Janib Se Imdaad Ka Intazam

Tarjuman ke mutabiq, NDMA ne Hukumat e Pakistan ki sarparasti mein Al Khidmat ki chartered flight ke zariye 100 ton imdaadi saamaan rawana kiya. Isme be ghar khandanon ki madad ke liye khuraak ke saath saath khaime, tarpaulin sheds aur jerry cans bhi shaamil hain.

Gaza Ke Liye Pakistan Ki Musalsal Madad

Tarjuman ne bataya ki Pakistan ab tak Gaza ke liye 25 imdaadi kafile rawana kar chuka hai. In sab mein mil kar 2427 ton imdaad bheji ja chuki hai. Pakistan ka kehna hai ki woh Gaza ke logon ke saath apna taawun musalsal jaari rakhega.

Antim shabd

Ye sab khabrein dikhati hain ki ek taraf corruption aur be-qaidgi se log pareshaan hain, toh doosri taraf hifazat, insaaniyat aur imdaad ke liye bhi aham qadam uthaye ja rahe hain.

10

Desh duniya ki Khabrein Ek Nazar Mein Online Slowdown Rishwatkhor Pakde Gaye Andon Ki Supply Mein Dhoka Aur Gaza Ko Imdaad